Bi de 4. GV sind alli Mitglider aawesend gsi

Am Mittwoch, 31. Oktober 2018 het di virti Generalversammlig vom Verband vo de Dütschschwiizer Mundart-Journaliste stattgfunde. Alli sibe Mitgliider sind – zumindescht zitwiis – aawesend gsi.
Am Aafang sind sächs vo oiserne sibe Mitgider aawesend gsi. Zunächscht het de Versammlig s Protokoll vo de letschte GV, wo i Form vomene Bricht vorgläge isch, eistimmig gnehmiged und di vom Vorstand vorgschlageni Statuteänderig, wo für di offiziell Kommunikation zwüsche de Verbandmitglider au Whatsapp und anderi Messengerdienscht ermögliched, eistimmig aagnoh.
Will de Kassestand nach wi vor bi null isch und es au kei Bewegige geh het, isch s Traktantum 4 schnell abghandled sgi.
Nach em Iiträffe vom sibte Verbandsmitgliid si mir zum Traktandum 8 cho, wo d Möglichkeit geh het, sich über verschideni Mundart-Projäkt, wo bi de Mitglider am Laufe sind, usztuusche. Nebe de Arbet vo de Wettiger Nochrichte het de Reto sin Daily Vlog vorgschtellt, wo au grad no oiseri Versammlig mit in sis Projäkt integriirt het.

Advertisements

De VDMJ wachsd witer

Am 28. September 2017 het di dritt Generalversammlig vom Verband Dütschschwiizer Mundart-Journaliste (VDMJ) stattgfunde. Genau zwei Johr nach de Gründig.
Schweizerkreuz VDMJD Mitglider vom VDMJ hend sich am letschte Donnschtig zu ihre jährliche Mitgliderversammlig troffe. Nebe de Diskussiuon um d Förderig vom Mundartjournalismus i de Schwiiz isch d Ufnahm vo de noie Mitglider s wichtigscht Traktandum gsi. Es sind drü Persone, wo noi bim Verband hend welle Mitgliid werde und alli drü sind eistimmig ufgnoh worde. Damit het de Verband in de Zwischeziit sibe Mitglider. Au s de Vorstand isch für wietri zwei Johr gwählt worde und bestoht witerhin us em Fabian Schmid und em Lutz Fischer, wo gmeinsam es Co-Präsidium bilded.

Bi de 2. GV vom VDMJ sind zwei noii Mitglider ufgnoh worde

Am Mittwoch, 21. Dezember 2016 het de Verband vo de Dütschschwiizer Mundartjournalischte (VDMJ) sini zweite Generalversammlig (GV) duregführt. D Sitzig het, wi scho d Gründigs-GV, z Wettige stattgfunde.
Schweizerkreuz VDMJD Ziil vom Verband hend sich nöd gändered. Es goht immer noch drum, Journalischte und Journalischte, wo in Mundart schriieb und ihre Bruef – oder besser ihri Bruefig – nebeamtlich usführe, en Presseuswiis chönne zur Verfüegig z stelle. D GV het bschlosse zwei noii Mitgliider ufzneh, wo scho für d Wettiger Nochrichte gschaffed und somit erfahrig im Mundartsjournalismus hend.
Nach de GV hend di aawesende Mitgliider sich über aktuelli Entwicklige im Mundartjournalismus ustuuschd und au d Gselligkeit isch nöd z kurz cho.

De Verband vo de Dütschschwiizer Mundart-Journaliste isch gründt worde

Zwyssighof
Zwyssighof

In Mundart schriibe? Und dann au no «ächti» Text, also nöd numme bi SMS? Abgseh vo e paar Mundartautore, isch das für vili unvorstellbar, bsunders wenns um Journalismus goht. Uf de andere Siite zeiget d Schwiizerdütsch Wikipedia, dass au aaspruchsvolli Tekscht in Mundart möglich sind.
Sowit mir das chöi überblicke, gits Nochrichte, wo im Dialekt verbreitet werde, bis jetzt numme in chline, privat betribene Portal. Für di wär es Vernetzig und en Erfahrigsustuusch guet und wichtig und mit em Presse-Uswiis, wo setigi Journalischte bi ois chöi übercho, zeiged mir au, dass – obwohl unentgeltlich und freiwillig – die Arbet en ernschte journalistische Biitrag wot si.